Тэатральныя ўрокі ў ТЮГу

Мэта тэатральных урокаў – пашырыць веды навучэнцаў малодшых класаў пра аўтараў любімых казак Братоў Грым і Х.К.Андэрсена, праверыць узровень самастойнага прачытання казак, развіць уменне вылучаць галоўнае, абагульняць, даказваць і рабіць вынікі, выгадаваць актыўную чытальніцкую пазіцыю, культуру маўлення. 

Пад час тэатральнага ўрока студэнтамі БДПУ ім. Танка была праведзена інтэрактыўная праграма для дзяцей паводле казак і фактаў з гісторыі ТЮГа. А ў тэатральным музеі маленькія гледачы пазнаёміліся з артыстамі тэатра – Людмілай Асмалоўскай (Авечка, «Воўк і сямёра казлянят»), Наталляй Якаўлевай (Мыш, «Дзюймовачка»). Напрыканцы навучэнцы падаравалі артыстам свае малюнкі, якія зрабілі адмыслова да тэатральнага ўрока, і сфатаграфаваліся разам з артыстамі на памяць.

Сумесныя Тэатральныя ўрокі арганізаваны ў межах дамовы аб доўгатэрміновым супрацоўніцтве паміж Тэатрам юнага гледача і БДПУ ім.М.Танка, якая была ўрачыста падпісаная 18 лістапада дырэктарам тэатра, Заслужанай артысткай РБ Верай Аляксандраўнай Паляковай-Макей і рэктарам БДПУ ім.М.Танка, доктарам педагагічных навук, прафесарам Аляксандрам Іванавічам Жуком.