Свята ў ТЮГу: прэм’ера спектакля і дзень абароны дзяцей

1 чэрвеня ў Тэатры юнага гледача з нагоды Міжнароднага дня абароны дзяцей адмыслова перад прэм’ерай спектакля “Кентервильское привидение” адбыліся святочныя дабрачынныя мерапрыемствы, арганізаваныя Міністэрствам замежных спраў Рэспублікі Беларусь і Дзіцячым фондам ААН. У свяце таксама прынялі ўдзел кіраўнікі і прадстаўнікі замежных дыпламатычных місій і міжнародных арганізацый, акрэдытаваных у Беларусі, а таксама іх сем'і. 

Перад спектаклем “Кентервильское привидение” ў фае тэатра адмыслова для маленькіх гледачоў была падрыхтавана забаўляльная інтэрактыўная праграма, арганізаваныя фотазоны, працавалі аніматары. Акрамя таго, дзеці маглі пачаставацца на дзіцячым фуршэце “Прысмакі народаў свету”, у межах якога пасольства Азербайджана, Венесуэлы, В'етнама, Індыі, Пакістана, Сірыі, Таджыкістана і Турцыі прадставілі свае нацыянальныя стравы.

На сцэне Тэатра юнага гледача адбылася ўрачыстая цырымонія ўручэння прыемных падарункаў і сюрпрызаў, якія былі сабраныя падчас дабрачыннай акцыі супрацоўнікамі МЗС і Нацыянальнага цэнтра маркетынгу і кан'юнктуры цэн, дыпмісіямі замежных дзяржаў і прадстаўніцтваў міжнародных арганізацый, выхаванцам Маладзечанскай спецыяльнай агульнаадукацыйнай школы-інтэрната для дзяцей з парушэннямі зроку, дзіцячаму дому №3 г.Мінска і Чэрвеньскаму дому-інтэрнату для дзяцей з асаблівасцямі псіхафізічнага развіцця, навучэнцам падшэфнай МЗС Перажырскай сярэдняй школы ім.А. Е. Гурыновіча.

Міністр замежных спраў Уладзімір Макей падкрэсліў, што ў Беларусі на практыцы надаецца значная ўвага забеспячэнню і абароне законных правоў і інтарэсаў падрастаючага пакалення. Для кіраўніцтва краіны няўхільнай ісцінай заўсёды было і будзе разуменне, што шчаслівыя, здаровыя, адукаваныя і актыўныя дзеці – гэта стратэгічны рэсурс і залог устойлівага развіцця і дабрабыту дзяржавы. Акрамя таго, Уладзімір  Макей падзякаваў замежным дыпламатам за ўдзел у дабрачыннай акцыі і гатоўнасць на практыцы прадэманстраваць агульнасць намаганняў і імкненне да забеспячэння шчаслівага, бяспечнага і спакойнага дзяцінства для ўсіх без выключэння.

Калектыў Беларускага дзяржаўнага акадэмічнага тэатра юнага гледача далучаецца да віншаванняў з Міжнародным днём абароны дзяцей. Бяспека і камфорт умоваў знаходжання ў тэатры – галоўная задача тэатра перад кожным чалавекам, і асабліва перад самым маленькім. ТЮГ першым знаёміць юных гледачоў са светам мастацтва, таму важна, каб дзеці атрымалі не толькі вялікае задавальненне, але і шмат карысці ад убачанага на сцэне. Яшчэ раз са святам і да сустрэчы ў тэатры! 

Крыніца: МЗС Беларусі