Театр юного зрителя

Скончыў БАМ у 1998 г. Актор тэатра і кіно.

У 2001 г. скончыў падрыхтоўчае аддзяленне Беларускай акадэміі музыкі, кафедра сольных спеваў. Драматычны тэнар.

Андрэй Каламіец прыйшоў на службу ў Беларускі рэспубліканскі тэатр юнага гледача ў 1998 годзе. За дзесяць гадоў напружанай творчай працы ён здолеў выканаць безліч роляў, якія вывелі яго ў разрад вядучых артыстаў рэпертуару. Сярод іх Хлопец (“Ноч на Івана Купалу”), Заяц (“Самы, самы, самы”), Крот (“Братка Асёл”), Салдат, Рыба-краб (“Сястра мая, Русалачка”), Казёл (“Кошчын дом”), Пульчынела (“Шчаслівыя жабракі”), Кот Леапольд (“Дзень нараджэння Ката Леапольда”), Салавей (“Гісторыя Паласатага Ката і сеньярыты Ластаўкі”), Тарантул (“Рыцар Ордэна Сонца”), Шаір, Джын (“Каліф-Башмачнік”), Сымон, Апалон (“Тарас на Парнасе”), Бойэ (“Марныя намаганні кахання”) і інш. Асобна варта адзначыць ролю Настаўніка ў спектаклі “Дурнічка” Лопэ дэ Вэга, заўсёды падцягнутага чалавека справы, цвёрдага, калі не сказаць – цвёрдага аж занадта і ваяўніча ў сваіх настаўніцкіх і выхаваўчых метадах, але шчыра заклапочанага справамі сямейства, якому служыць. У спектаклі “Прыгоды Бібігона” для самых маленькіх гледачоў А.У.Каламіец выканаў самую адмоўную ролю – індыка Брундуляка, бессаромнага манюкі, зайдзросніка ды звадніка. З якой асалодай маленькія гледачы караюць Брундуляка, кідаючы ў яго мячыкамі! Але актор паступова падводзіць дзятву да думкі пра тое, што Брундуляк – вельмі адзінокі персанаж, яму бракуе сяброўства ды паразумення, ён варты шкадавання і спачування, – так, што ў фінале дзіцячая аўдыторыя шчыра даруе індыку ягоныя ўчынкі і дазваляе скакаць і таньчыць у сяброўскім коле. Да шэрагу гэтых яркіх, запамінальных вобразаў далучылася роля падлетка Фрыца (“Шчаўкунчык” Э.Т.А.Гофмана), захопленага ваярскімі гульнямі, салдацікамі, марамі пра перамогі, вялікага аматара слодычаў ды дзівосаў хроснага Дросельмаера, - хлопчыка, які шчыра і адважна жадае перажыць усе выпрабаванні пад час ночы Нараджэння Хрыстова (іншая рэч, што выпрабаванні прызначаны для ягонай сястры Мары). Варта адзначыць і характарныя, гратэскавыя вобразы Настаўніка фехтавання (агрэсіўнага салдафона і грубіяна) ды Спевака-завадатара (пестуна-капрызніка) ў спектаклі “Мешчанін у шляхецтве” Ж.Б.Мальера (сцэнічная версія ТЮГа).
Актору ўласцівыя трапнасць сцэнічных характарыстык персанажа, дакладнасць матывовак любога ўчынку або намагання, заглыбленне ў вобраз, здольнасць увасобіць і выканаць ролі рознай жанравай накіраванасці.
Талент А. Каламійца быў адзначаны на Маскоўскім тэатральна-тэлевізійным фестывалі “Маладосць стагоддзя” (2002г.) дзе Андрэй Уладзіміравіч атрымаў узнагароду за лепшае выкананне мужчынскай ролі.

Прэса:

Беседа с актёром Андреем Коломийцем во Всемирный день театра (аудио)